100 Joor BCO Alemannia

Liebi BCO Alemannia-Familie

100 Joor isch für e Verain wie miir das sinn e seer e grossi und au stolzzi Zaal!

BCO Alemannia isch jo wie ne «Dorfverain», aifach im schööne Glaibasel und isch bekannt für e familiääri und fründschaftligi Atmosfääre. Entstande isch unsere Verain jo im Joor 2002 durch d Fusioon vo BCO Basel (Gründigsjoor 1919) und em FC Alemannia Basel (Gründigsjoor 1921). Iich sälber ha bi dääre Fusioon als erschte Preesi däm Verain dörfe vorstoo. Riisig isch mi Stolzz denn bim Ruggdritt gsii, wo d Generaalversammlig mii denn au zum erschte Eerepreesi vo unserem wirgglig feine Verain ernennt het. Dr Krais schliesst sich jetzt für mii mit dr Organsazioon vo unserem 100-Joor-Fescht und dört wänn miirs denn au so richtig krache loo. Zämme imme Super-Tiim organisiere miir für am 10. Auguscht 2019 e hoffendlig gueti und au würdigi Sach – miir würde n is riiiiisig fröie, wenn möögliggscht viil vo öich, zämme mit uns dää aimoolig Aaloss würde fiire!!!

Mit grosser Vorfröid griesst
dr Marco Bachmann
dr Ookaa-Preesi vom 100-Joor-BCOA-Fescht

Ich bi stolz uff unsere Verein, dass är d’Fusion vom 2002 guet und erfolgriich bewältigt het. Näbscht em Fuessball verbindet mich mit BCOA vieli tolli Kollege, Fründe und schöni Erinnerige. Es würd mi für d’Zuekunft vom BCOA sehr freue, wenn „mir Alte“ als Vorbild für dr eehreamtlichi Yysatz stooh chönnte und dodrbii vieli Jungi drzue annimiere s’gliiche z’mache und so am BCOA e sicheri Zuekunft z’gää. Dr Verein liegt mir sehr am Härze und us däm Grund setz ich mich u. a. au im Ookaa 100 Joor BCOA ii!

BCO Alemannia bedütet für mi Familie und ich freu mi sehr e Bitrag zu däm tolle Fescht dörfe z’leischte!

100 jöörig, aber modärn und lebändig, es freut mi sehr, Teil vom Ookaa fürs grosse Jubliäumsfescht dörfe z si!

100 joor BCOA; aifach numme stolz do druff!

E starggs Zeiche vo Tradition. Mir stöhn sit Joore für Wärt, wo hüt leider viel z’sälte gläbt wärde. Uf e erfolgrichi und langi Zuekunft!

Ich freu mi usserordentlich e Teil vo däm grossartige Ereignis dörfe z si und mi Bitrag drzue kenne z leiste. E Mitgliid von Ookaa derfe z si bedütet mir enorm viiel.

Uff wyteri tolli und erfolgrichi Joore bi BCOA!

1 Verein – 2 Gschichte – 1 Familie

Ai grosses Fescht für e grossi Familie.